Tagimpan at Misyun ning kekaming Parokia

King pamakiyagum king dalise nang lugud ning Dios a Ibpa
king matibe kasalpantayanan kang Jesukristong Ginu
king mabie kapanaligan king Banal a Espiritu
king panalangin ning Birhen Maria at king pamanantabe nang San Vicente Ferrer;

Kaibat ning masusing pamigunam king kabilyan ning bie kasalpantayanan, papasiag ta ya iting makatuki, anting kekatamung tagimpan at misyun laluna kaniting apulung banuang pamagsadya king ika dinalan nang anibersaryu ning pangatatag ning parokya:


Tagimpan

Tagimpan taya ing metung a mibabayung balayan a ing sentro ning bie yapin I Kristo.

Misyun

Ulina niti tatalaga tamu ing kekatamung sarili karing makatuking misyun:

• ubugan at iyanad ding anak
• pasiknangan at akayantabe ding kayanakan
• patatagan at bukluran ding pamilya
• gawang mabie at makabaldugan ing miyayaliwang kapagmasusyan karing sakramento at bie pamanalangin at kapanyamban
• palaganapan ing pamagaral at pamipatutu king amanu ning Dios
• sumuyu at magmalasakit karing kalulu at mangailangan lingap
• Misanmetung tamu king pamanalangin at pamagobra para king pangatupad da reting tagimpan at misyun ban sumulung ing bie kasalpantayanan. Maging mayap a tau at kristiyano. Abe-abe maging balayan a talatuki at balayan a mituburan.