Mapaling Panaun, Mapaling Pamananggap

Napun, a-20 ning Hulyu, etad de ring tau-Bulaon, Parokia ning Mayap a Pastul, a panimunan nang Among Mar, karelang kura, ding larawan na ning Virgen de los Remedios at sto. Cristo del Perdon king parokia ning San Vicente Ferrer, Calulut.

Agiang minuran at kaibat siningo ing pali at lisangan ela mesira lub ding dakal a tau Calulut ban salubungan ding adwang larawan.


Nung piyabe tala ding taung menibatan karing adwang parokia a tinagun, atin lang 3,000. Inya pin agiang atin yang karagulan ing pisamban ning Calulut, ela mikasya ding tau.

Mapali ing panaun, tutung malisangan, pero ini eda pinansin ding debotu. Ing tune mapali apin ing pamananggap ding tau Calulut a penimunan nang Among Ding, kura.

Dakal a tau, lalaki na memusan karing imahen, babai na mengadi kabang prusisyun at anak na migkanta at tinerak.

Ana pin Among Ding, " aliwa mu ing mall o sabung ing makapagpatipun karing tau, nune pati ing kasalpantayanan."

Tune pin ing sinabi na uling bilang aktibung miyembru ning kekaming parokia ngeni miya pa ikit ing kekaming pisamban na sinapak angga na king patio at dalan. Matua, lalaki, babai, kayanakan at anak, ila ngan minta, migsakripisyu.

Tune aliwa ya igut ing birhen at ing keyang anak.